Kubika uVusi Shabalala kanti nezithombe zithwetshulwe nguye
Sekusemthethweni. Ibhilidi eliyiNhlokohhovisi yoMnyango Wezemisebenzi Yomphakathi KwaZulu-Natali manje selibizwa nge- OR Tambo House. UMhlonishwa uMnu. RR Pillay, onguNgqongqoshe weSifundazwe ophathiswe uMnyango Wezokuhlaliswa Kwabantu kanye Nemisebenzi Yomphakathi KwaZulu Natali wembule isithombe esihlonipha iqhawe lomzabalazo u- OR Tambo waphinda futhi waqamba ngokusemthethweni iBhilidi eliyiNhlokohhovisi yoMnyango Wezemisebenzi Yomphakathi KwaZulu-Natali eliku- 191 Prince Alfred Street eMgungundlovu, ngegama likaMnu. Tambo. Lo mcimbi ubusingathwe ngoLwesine, mhla zingama- 28 kuZibandlela kowezi- 2017, ngehora leshumi nanye, esangweni leNhlokohhovisi.
INhloko yoMnyango uMnu. Mdadane enoNgqongqoshe weSifundazwe uMnu. Pillay ngenkathi kwembulwa isithombe esingumfanekiso ka - OR Tambo
Lo mcimbi ubuhanjelwe yiNhloko yoMnyango ebambile, uMnu. Thulani Mdadane okunguyena onikeze amazwi okuvula kanye nawokwemukela ngokunjalo noNgqongqoshe weSifundazwe, uMnumzane Ravigasen Ranganathan Pillay, okunguyena owethule inkulumo yosuku. Kubalulekile ukuveza ukuthi phakathi kwezikhulu ebezikhona singabala uMqondisi Omkhulu Wemisebenzi Edidiyele, uMnu. Phiweyo Duma kanye noMqondisi woPhiko olubhekele Izindaba Zabasebenzi, uMnu. Glen Sithole, uMnu. Gcina Hadebe, onguMqondisi Wehhovisi Lesifunda i-Midlands, uMnu. Clement Luthuli, onguMqondisi Wesifunda saseThekwini kanye nabanye abaningi aBaqondisi abebephuma eNhlokohhovisi, ngokunjalo nalabo abebebamele futhi bemele nabasebenzi kubandakanya nezinhlaka ezisebenzisana nalo Mnyango, izimenywa kanye nabezindaba abebehambele lo mcimbi.
UMqondisi Wohlelo, uMnu. uMthokozisi Nene, uwuphathe ngesinono nangobuchule lo mcimbi obumkhulukazi. Ungumuntu onolwazi olunzulu ngoMnyango Wezemisebenzi yoMphakathi kanti futhi uyiphatha ngogqozi nangomdlandla imicimbi eyehlukahlukene yalo mnyango. Kuyajabulisa- ke ukuthi, iningi labasebenzi liwesekele kakhulu lo mcimbi, yize bekuyisikhathi lapho iningi labasebenzi belithathe umhlabakhefu wesikhathi samaholidi.
Enkulumeni yakhe, uNgqongqoshe weSifundazwe, u-Pillay ubeke wathi, “Kumele sigweme umkhuba wokunaka okuyizinkinga kanye nokukhombana ngeminwe, ikakhulu lapho izinto zingahambi kahle emnyangweni, kodwa kunalokho kumele sisebenze ngokubambisana ngenhloso yokuphuma nesixazululo.” NgokukaMnu. U - Pillay, ubuholi buka - OR Tambo kusinikeze isikhathi kanye nesigcawu sokuhlinzeka izixazululo zezinselelo esibhekene nazo njengamanje siphinde futhi sikhuthazeke ekusebenzeleni ikusasa elingcono lawo wonke umuntu. Uqhubeke wathi, “Asikwazi ukuthola konke esikudingayo ngesikhathi esisodwa. Kumele silandele izindlela zobuholi kanye nemigomo ka - OR Tambo eyosiza wonke umuntu ukuba enze futhi akhulume ngokuzethemba ngekusasa ngoba impokophelo yethu kanye nokubekezela kwethu kuyothela izithelo ezinhle kusasa.”
Ukuzethemba kwabaholi yikhona okubenesandla esikhulu ekukhetheni kanye nasekumemezeleni igama elisha laleli bhilidi. Kuyiqiniso ukuthi imisebenzi eyenziwa yilo mnyango kubandakabnya namakhasimende awo akushintshile, nokho- ke ulimi oluvame ukusetshenziswa oluthi “191 Building” alukaze luwumele ngendlela efanele uMnyango Wezemisebenzi Yomphakathi kumbe uHulumeni. Lesi sizathu siyezwakala futhi sisemthethweni. Ngaphezu kwalokho, lokhu kubeyingxenye yemibungazo yesifundazwe ebimaqondana nekhulunyaka lokuzalwa kuka- OR Tambo. Leli bhilidi liyiNhlokohhovisi yomnyango Wezemisebenzi Yomphakathi eMgungundlovu. Enkulumeni yakhe echaza ngesimo sesifundazwe ayethula ngasekuqaleni ngonyaka, uNdunankulu uMnu. Willies Mchunu wakhipha isimemezelo sokuthi uhulumeni wesifundazwe uzohlonipha leli qhawe lomzabalazo eseladlula emhlabeni. Lokhu- ke kwabe sekulandelwa yizingxoxo nenhlangano ebizwa nge - Oliver and Adelaide Tambo Foundation kanye nomndeni owabe usuvuma ukuba kuqanjwe leli bhilidi.
Ingxenye yesibili kanye nesemqoka yohlelo kube sekuba ukwembulwa kwesithombe esingumfanekiso ka- OR Tambo, esifakwe endaweni yokwamukela izivakashi kuleli bhilidi. UMnu. Mdadane ube esehola uNgqongqoshe weSifundazwe, uMnu. Pillay baya esithombeni esingumfanekiso ka- OR Tambo ngenkathi ithimba libalandela ngemuva. Ngenkathi uMnu. Pillay embula indwangu emnyama, entofontofo yevalivethi esithombeni esingumfanekiso ka -OR Tambo, kuthule kwathi cwaka endaweni yokwamukela izivakashi. Ngalowo mzuzu, bekunomuzwa wokuzotha obuhambisana nokuthula, ngenkathi kuvunguza umoya ‘wenkululeko’ ezinhliziyweni, ngakolunye uhlangothi, umbuthano ubunomuzwa wokuzithoba okuphuma ekujuleni kwezinhliziyo. Emva kwalokho, kube sekujatshulwa kwaqhuma ingoma kuhalaliswa, ngenkathi abaphathi bethatha izithombe eduze nomfanekiso ka-OR Tambo.
Ekupheleni kohlelo, uNgqongqoshe weSifundazwe kanye nazo zonke izimenywa babe sebethola isidlo sasemini, nokuthe emva kwalokho, kwabe sekubuyelwa emsebenzini ngokujwayelekile. Sekusemthethweni; ibhilidi eliyiNhlokohhovisi yoMnyango Wezemisebenzi Yomphakathi KwaZulu-Natali manje selibizwa nge- OR Tambo House.